中國人如果要擋煞，就通常會用三叉八卦，至於西人嘅碧咸要擋緋聞又用乜嘢呢？之唔係用入球囉！「萬人迷」最近負面桃色新聞纏身，不過呢名35歲嘅洛杉磯銀河中場一於好少理，揸緊踢好波嘅宗旨；喺周日對美國芝華士嘅美職聯中，仲取得個人一年多以嚟嘅首個入球，協助球隊以2:1勝出，目前以53分喺總成績榜首領導群雄。
碧咸繼當年效力皇馬時被指「偷食」之後，最近俾一單又一單嘅緋聞纏身；既被波斯尼亞裔妓女妮絲（IrmaNici）指佢召妓兼玩「3P」，最近仲反告碧咸令佢帶嚟「精神及肉體上創傷」，又無端端捲入囝囝同學父母嘅離婚訴訟中。不過，行走江湖多年嘅碧咸，就知道要呢啲負面新聞「彈開」，最緊要係喺球場上取得好成績，塞住批評者把口。
維多莉亞風騷晒婚戒
因此，碧咸喺周日銀河鬥美國芝華士場洛杉磯打吡戰，雖然只不過係傷癒之後第2次正選，但已經操得好「弗」，亦踢得好落力；佢仲喺39分鐘用「黃金右腳」，離門26碼射入靚自由球，加上先前隊友艾臣布度喺23分鐘建功，協助銀河以2:1勝出，目前喺聯賽以27戰53分居首，以兩分領先皇家鹽湖城，有機會成為常規賽盟主。
由於呢一球係碧咸喺09年9月19日對FC多倫多之後，個人喺正式比賽嘅首個入球，佢賽後亦好興奮咁話：「我由出腳嗰一刻，已經知道個波會入網，就算對手有個好龍門亦都係咁話！」雖然碧咸喺比賽64分鐘就被換出，不過佢就話：「我目前好『弗』，信心亦強，我被換出只不過係因為球隊喺星期四又有波踢啫！」
唔單止碧咸風騷，佢太座維多莉亞，亦喺上周六同碧咸同埋朋友出外消遣時，有意無意舉起左手晒婚戒，以行動證明同碧咸嘅婚姻，EQ真高！