獅子行高層大執位已經塵埃落定，不過，一手揭開呢間全球市值第3大銀號巨變黑暗面嘅英國傳媒，對新管理團隊依然鍥而不捨，不過，目標人物就由即將告別前台嘅行政總裁紀勤，轉向候任新貴歐智華。
華爾街日報旗下《FinancialNews.com》，噚日就刊登咗篇題為「投資者質疑歐智華仍擬保留現職（環球銀行及資本市場主管）」嘅分析，仲訪問一班滙控（005）投資者，對「九叔」（市場對歐氏暱稱）可能續任GBM阿頭睇法，結論當然係唔老利居多，認為呢個若非過渡性而係長期安排，佢會兼顧唔到集團其他業務。報道仲引述一名資產管理公司高層，用到「黐線」（insane）咁激嘅形容詞。
或續掌GBM被鬧「黐線」
其實，現階段呢啲揣測，都係好似山草藥咁「噏住先」o架啫，歐智華坐上CEO呢個位，只不過係兩星期前先公佈，佢喺電話會議都講過，GBM盈利佔比最多4成呢個政策不變，暫時滙報機制亦唔改，繼續由SamirAssaf同RobinPhillips，分別做環球市場同銀行主管。
明眼人話，呢的都係例牌嘅「跑馬仔」安排，過得一排，自然會跑出一個接班人咁話。
李華華
mailto:[email protected]