中央再出招打壓樓市，反而觸發內房股爆升，連分析員都話始料不及。內地股民似乎眼見樓市鬆綁無望，實行冇有怕向中央晒身家，無他，銀行利息低，放入去盞跑輸通脹，坊間可以儲存財富嘅地方惟有股與樓，去外國置業又唔係人人識，資金一下子將積聚幾個月嘅購買力一次過爆發出嚟。睇見咁嘅現象，中央應該明白市場至係最終揸Fit人，行政手段用得多易失效，隨時再而衰、三而竭，睇嚟阿爺要諗諗點樣調整落藥嘅力度同時機。
港股一樣大玩心理戰，超買之後稍回補上升裂口已經唔係好肯跌，9月升咗超過8%，多得美元跌得狠，周圍都唔安全，香港資金卻自出自入，亞洲及新興市場有晒買上去嘅理由畀經紀Sell客。不過大家有冇發覺，期指未平倉合約已經好不尋常咁月頭已經超過10萬張，睇嚟呢個傳統股災月又係一個殺戮戰場大賭單邊，總之，早一兩個月牙斬斬話港股估值吸引，現時升到往績PE18倍同今年14.5倍，好多人已覺高處不勝寒，查實恒指就算升到上去26500，2010年PE才17倍，到時至係擔心嘅時候。
洞悉形勢免中伏
咁家應該擔心乜？好明顯係資金係咪繼續流入，皆因在牛市見頂同熊市觸底階段，基本面即估值同業績，對市場影響力僅為40%，其餘60%受政策同市場情緒主導。
既然市場已進入升市最後階段，持貨者只可因勢利導，按07年10月尋頂方式，以10日同50日線支持位作止賺/離場指標。因為到咗慾望橫流嘅瘋狂境界，「上帝要你滅亡、必先令你瘋狂」嘅集結號又再響起，你就要炒得清醒精叻啲。市場嚟緊將會大玩心理戰，表面上同大市對着幹嘅股份，隨時會令你中反間計；唔少中途扮死嘅股份，待你反手去加沽，又會好似無聲狗咁轉頭一啖噬番轉頭。投資者要戰勝市場，心理學知識必不可少。
胡孟青
作者為獨立股評人