唔少政界中人每逢暑假都會周遊列國唞吓暑，金勞詹通常都係去美國拉斯維加斯，玩番兩手百家樂就係佢最大嘅減壓方法。早幾日金勞詹又飛咗去拉斯維加斯度假，今次最特別係佢除咗一如過往喺賭場上有所斬獲，仲代表港人揚威，成為百家樂之王。
首度由港澳人士奪冠
身在賭城嘅金勞詹向八方報喜，話喺美高梅賭場參加百家樂之王大賽，結果撼低百幾二百位嚟自唔同地區嘅對手，贏咗冠軍。除咗現兜兜75萬美元現金獎，連同其他獎品總值應該袋過百萬美金。有錢到手對佢嚟講係其次，佢最開心係獲頒金牌，證明佢嘅賭錢食力。
要撼低世界各地賭神贏冠軍應該好難o架，但金勞詹淡淡然咁話，只不過係賭咗四場，每次個零鐘頭，結果就摘下冠軍，可能都有啲彩數喎。其實佢過去兩度參賽，但都冇攞到任何獎項，估唔到今次揚威海外。八方聽聞呢個比賽首度由港澳人士奪冠，金勞詹都算係創下歷史，但金勞詹不忘提醒大家，小賭怡情，大賭亂性，賭仔要適可而止量力而為。