噚日朝早環境局副局長潘潔喺立法會被議員狂質政府用郊野公園土地做堆填區，但局長邱騰華就去咗參加蓬瀛仙館吉澳地質教育中心開幕禮。
邱局一落船，吉澳村民就敲鑼歡迎，村長又請佢食柴火整嘅茶粿，仲大讚邱局係「最靚仔局長」。有英國回流嘅村民一見邱局到訪，即刻冲杯cappuccino畀佢試吓。邱騰華大讚咖啡香，話好有人情味，有錢都買唔到，比office咖啡好飲得多喎，場面不知幾咁「溫馨」。
開幕禮完咗，一班鄉親父老又請局長食客家菜，菜式包括新鮮鮑魚、龍躉、千幾蚊一斤嘅魚鰾、吉澳最出名嘅手打墨魚丸等等，仲有紅酒飲。飲飲食食，嘻嘻哈哈，又半日。