商天娥前晚喺灣仔君悅酒店同男友李偉誠（Patrick）結婚擺酒，除咗83年無綫第12期藝員訓練班嘅同學劉嘉玲、吳君如同劉青雲等人外，佘詩曼同崔建邦喺大埔做完《公主嫁到》活動之後，亦都即刻趕去恭喜娥姐。
女同學冧吳啟華
新人註冊儀式喺夜晚9點幾進行，喺宣讀誓詞嗰陣，新郎哥因為太緊張而講錯嘢，將原本「我想請在座各位」噏錯做「我坐」搞到全場大笑；不過，婚宴高潮係嘉玲、君如、華倩同青雲成班訓練班同學上台互相踢爆，連曾志偉都忍唔住上台大爆娥姐以前暗戀杜琪峯，點知娥姐唔單止唔介意，仲當眾承認話：「係呀！」搞到全場譁然。
青雲話知道娥姐結婚，即刻主動打電話畀娥姐要求嚟飲，嘉玲都話自己打畀娥姐話一定要嚟飲喜酒，搞到娥姐好感動。之後，佢哋又大爆以前訓練班啲女同學個個都勁冧吳啟華，覺得佢係全班最靚仔嗰個。
否認大肚勁劈酒
之後娥姐喺台上多謝父母時，終於忍唔住喊到豬頭咁款。一向飲得嘅佢，成晚又紅酒又白酒係咁劈，最後嘉玲再敬佢一杯香檳，同佢話：「講咁多做乜吖，飲啦！」結果飲到娥姐pairpair夫要唞唞。除咗娥姐要唞，志偉喺婚宴上客串做司儀，仲即興上台唱一曲《UnchainedMelody》，落台後就醉到不省人事。婚宴之後，娥姐同Patrick再去英皇駿景酒店開party，同阿佘、阮兆祥同埋吳啟華等老友飲到天光。
另外，有報道話娥姐前日結婚時自認有BB，其實完全係一場誤會，娥姐只係提醒在場影相嘅攝記小心撞親後面嘅BB，唔係話自己有咗！