民間電台噚日五歲，夜晚喺旺角某酒樓擺成50幾圍，場面極之熱鬧，連留院中嘅華叔都向醫院請假到場。華叔精神唔錯，自言病情平穩，癌指數58，比之前高少少，但屬化療之後嘅正常反應，今日會再做化療。
林依麗想除衫被阻
人哋壽宴通常張燈結綵，播啲喜慶音樂，民台喺酒樓就掛晒橫額，大大隻字寫住「撐民間電台」，十足集會現場咁款，仲播埋《自由花》，氣氛澎湃。開席後，樂壇長毛周博賢獻唱佢為民台創作嘅新台歌《寧鳴而死》，連份手稿都拎埋出嚟拍賣，賣到六千蚊。
另一矚目拍賣品係華叔嘅墨寶期貨，即係家未寫但華叔一出院就會按買家要求揮毫，結果喺一片混亂中居然由長毛以一萬蚊投得。長毛仲口衰衰咁話，由佢投得民主黨嘅嘢，「我係咪有病？係咪上咗腦呢？」八方擔心，唔知長毛會叫華叔寫乜？
陳日君樞機公幹嚟唔到，但一早捐出佢嘅兩幅書法，一幅係「行公義好憐憫」，由毓民以萬八蚊投得；另一幅「寧鳴而死不默而生」就賣到兩萬蚊。最搞笑係林依麗想揼陶傑心口時，話如果陶傑肯出一萬蚊佢就即時除衫，嚇到主持彭志銘立刻話不如畀一萬蚊叫林依麗着番衫。