朗尼有救囉！講嘅唔係佢事業發展，而係佢噚日同老婆高蓮一齊飛去布拉格補鑊兼再度蜜月，似乎有望修補關係。咪以為高蓮姐咁易話為，據講佢之前大發雌威，訂咗好多規條畀朗尼，朗尼同坐監冇乜分別，家陣有得去旅行，算係為召妓贖罪，受刑後換嚟嘅甜頭。
「出冊」同老婆遊布拉格
據《世界新聞報》所講，喺朗尼近日養傷期間，不嬲以女強人姿態示人嘅高蓮頒佈好多禁令，包括朗尼兩大嗜好：唔准同友人外出飲嘢，仲有唔准再好似以前咁，成條死蛇爛鱔挨住梳化打機。呢兩樣係朗尼最鍾意做嘅事，被禁制等同攞佢半條命。鬼叫佢當日滾得咁過癮，抵死！
唔止咁，朗尼做咗破壞家庭嘅事，高蓮要佢做番啲對屋企有貢獻嘅嘢，就係要做家務，例如髹吓油同埋整吓門鉸。知情人士話：「總之，高蓮想令朗尼越唔舒服越好。」家陣高蓮肯擺低囝囝佳仔搵人照顧，而同朗尼去布拉格玩4日，可以話係「出冊」，係朗尼聽聽話話之後得到嘅回報。朗尼仔，要好好珍惜今次旅程啦。
高蓮擺明有心軟迹象，但唔係個個都寬恕佢，好似有傳不嬲搵朗尼做代言人嘅可口可樂公司，已打算起佢飛腳，唔再搵呢個形象插水嘅名人賣廣告，對朗尼損失唔細o架。另外，又有指本來打算同朗尼續約嘅曼聯，亦hold住個計劃。朗尼日前接受SkySports訪問時大談今次召妓醜聞，特別係有冇影響佢狀態：「我唔可以話有，但又唔可以話冇，總之呢段時間好難捱，我希望盡快可以重新投入足球。我只係一個普通人，我都會覺得受傷害。」
傳被可口可樂飛起
曼聯前日作客新特蘭又和波，領隊費格遜話就話滿意球員表現，但連續4場作客聯賽失分，心情好極有譜，奉勸朗尼呢期都係唔好惹費Sir為妙。一於同老婆叉足電，然後透過國際賽寓賽於操，英軍領隊卡比路講到明希望12號對黑山場波派朗尼落場，對朗尼最不離不棄嗰個，似乎係卡比路。