「懷緬過去常陶醉」，是中年男人特徵之一。57歲的梁耀忠，花兩年多時間寫自傳，年前又為江瓊珠拍攝紀錄片，遠渡重洋尋覓故友。這麼早就要為人生作結？「只係咁啱有咁嘅機會，希望將自己嘅體驗同人分享，同時反思自我。」由英國、社運朋友、馬拉松以至兒子，讓你我重新認識這個銀髮的「耶穌忠」。
紀錄片《就是一場馬拉松》昨日首映。主角梁耀忠說，電影主旨是尋根，找回塑造梁耀忠的人生足迹。片名是他的人生寫照，也是他對社運最深切的體會：「人生似馬拉松，社會運動都係，成件事可以好長遠，唔知幾時先會見到終點。而喺跑呢條路中間，總係有人會放棄，會離開咗，只有自己堅持唔好被佢影響。」跑過八屆渣打馬拉松全馬的老將說。
與社運戰友重遊舊地
70年代他跑到英國伯明翰半工讀大學，今次為拍攝舊地重遊，梁耀忠由當年社運好戰友「揸巴士」Jabez陪同，兩個白頭佬一起搜索失落了的年頭：找回當年一班華人僑生夾錢出版的政治刊物及雜誌、重回大學及打工餐館、與昔日友人會面。當年戰友難得敍舊，不忘揶揄他：「做乜咁無聊拍自傳？你有乜咁值得拍先？係咪諗住選特首所以谷人氣呀？」
一眾友人娓娓道出，還有舊時黑髮忠哥的雄姿：參與大學社運，成為唯一一個脅持大學行政樓抗議削資的亞洲學生；友人論政時家中只有一條麪包及一塊壞掉的牛油，他照吃如儀以免浪費，卻又同時無條件資助無政府主義者交學費，偉大得被友人冠以「耶穌忠」稱號。友人補充了梁耀忠的回憶，但銀幕上的梁說：「好多地方唔同咗，所有嘢唔同晒，我好似搵唔到自己……」
英國行片段完結，緊接還有梁耀忠的人生多面：少不了的馬拉松、新青學社友人團聚、爭取六四……韶華去，驚覺逝去了的都已逝去。
呢條路我仲要繼續跑
同場加映還有處女下海自傳《我固執，而持久地，過這種生活》，因友人一句「人哋個個都做點解你唔做」而無心插柳成書，逾15萬字，花兩年多時間完成，「當初試過搵人寫，後來發覺唔係咁好，結果都係自己落筆。文筆係唔順，但係好開心做今次回顧」。故事從他中學畢業後碰到舊同學開始，記錄他參與社運至今的經歷，一步一腳印。
自傳印了二千多本，五篇序言主要由演藝界人士撰寫，包括亦師亦友的岑建勳、許鞍華，「冇搵政治朋友或者同僚，減少是是非非」。自傳獻給19歲兒子，「年輕人應體驗更多嘢，我都希望我個仔有咁嘅機會。我唔會刻意鼓勵佢參與社會運動，希望佢自己體驗咗，先決定自己人生路」。兒子無意從政，做父親的只得尊重。但梁耀忠自己，已跑了30多年社運路，「今次回顧之後，對社會同對自己都有反省，呢條路，我仲要繼續跑」。
記者 夏志禮