今期《新亞生活》月刊（九月十五日）有兩個特輯，其一係「錢穆先生逝世二十周年紀念專輯」，其二係「楊汝梅教授紀念特輯」，好值得一讀。錢穆先生生於一八九四，逝於一九九○，今年係逝世二十周年，台灣馬英九總統特別出席追思會，親向錢夫人胡美琦女士就台北市政府逼遷錢先生一事道歉。錢夫人寫咗一篇「百感交集二十年」，說出當年錢先生自港遷台建造「素書樓」之來龍去脈及錢先生晚年失明，在雙目不能見字情況下（一九八三），出版《八十憶雙親》一書，前後花了五年時間，換得十五萬元台幣稿費，讀之令人心酸。民國人物禮賢下士，蔣介石、蔣經國兩位總統直接指令興建素書樓供錢先生夫婦居住，但李登輝住入總統府，陳水扁在台北市政府話事之後，市政府就指素書樓係違章建築，政府用地，係要逼遷，錢先生遷居後三個月，就無言而去矣。
錢先生之生平及著作，廣為人知，不必左丁山饒舌，楊汝梅教授呢，恐怕除咗早期新亞會計系學生之外，其他人對佢並不認識。講新亞創辦人，自不然係錢穆、唐君毅與張丕介。錢先生知人善用，知道自己與唐先生都係文史哲專長，不擅實務金錢管理，故此搵埋經濟學名師、土地經濟學家張丕介教授加入，當時錢先生又講過：「又有楊汝梅，在大陸金融界負盛名，與余為新識，亦邀其來校任教。」如何負盛名？據饒美蛟校友（前嶺南大學副校長）、董家池校友為文介紹，楊汝梅先生原來係中國第一位研究會計學嘅博士，生於一八九八年，一九二六年得密歇根大學經濟學博士學位，論文題目：「商譽及其他無形資產（GoodwillandotherIntangibles）」，一九二七年在紐約出版成書（係會計學歷史上研究商譽嘅經典論述）。楊先生逃難來港前，曾任國立暨南大學商學院院長，一九四三年出任中央、中國、交通、農業四大銀行總處會計長，學術與實務融會貫通。來港後錢先生立即延聘之。猜想當年楊先生如加入上海幫商界，應該不愁出路，收入更高得多，但楊先生竟願意加入新亞與錢唐張一齊捱窮，為教育理想而奮鬥，成立新亞會計系、商學系，既可見錢先生之號召力，亦可見楊先生之高尚風骨。