「邦民女」陳嘉寶(Anjaylia)近年工作量不斷上升,為方便出入,Anjaylia決定考車牌,日前學滿30多個鐘的她在何文田考路試,怎料轉彎時不慎錯手鏟上行人路邊,結果考試「肥佬」收場。Anjaylia事後謂可能一直只在夜間學車,結果日間在路上行車未能適應致出錯。
陳嘉寶目前雖然仍在求學,但她未有放棄模特兒工作,故此每日時間表均排得相當緊密,早前她的起心肝考車牌,學滿30多個鐘後,日前正式到何文田考路試。當天下午她準時到考試中心,考牌官未出現前,她坐在車內不時飲水,表現緊張。
泊位試合格
正式考試時,Anjaylia先考泊位,表現得雞手鴨腳下的她,總算順利將車停泊在格內合格過關。
之後Anjaylia正式出路面考路試,約10分鐘後駕着車返回考試中心,只見她甫落車即擰頭,又向經理人做出自刎動作及扁扁嘴,示意「肥佬」不合格。接受訪問時,Anjaylia一臉失望地說:「其實其他都合格,但出街時一個轉彎唔小心鏟咗上少少行人路邊,考牌官話唔可以pass,咁就肥咗喇。」
心情墮谷底
已知自己不合格的Anjaylia,苦笑謂不想入考試中心取回成績單,又心急地詢問可否馬上重考,還聲稱若有機會立即再考,有信心必定可以過關,得知最快也要等一星期及路試未必重考同一路段時,即表現失望。
Anjaylia說:「其實我揸車係冇乜天份,加上學車以嚟都係夜晚,今次係第一次朝早揸車,可能唔適應先肥佬,唔知可唔可以夜晚考呢?」雖然她自稱不是太失望,但又表示曾有一刻心情跌至谷底,似乎考牌「肥佬」的確令她情緒受影響。
採訪:魯萍
攝影:黃文偉