上次提到公司班I.T.同事，原來對投資好有心得，除咗炒股，對期權都有認識。雖然佢哋成日話要同敏妮一齊切磋，但敏妮係「學神」級別，兼且好少落場「實習」，所以同呢班I.T.師兄嘅功夫，差距好遠。
期權交收揀舊客
講開大家買期權嘅經驗時，敏妮提到之前short咗9月份滙控（005）Call，行使價80蚊，點知滙控喺公佈業績後，股價走勢凌厲，到咗行使價，但好彩對家冇行使認購權。敏妮一直都好疑惑，點解畀錢買Call嘅投資者，有錢賺都唔行使認購權。後嚟股壇前輩解釋，可能對於嗰位對家嚟講，買個Call係想為自己嘅投資組合做對冲，根本無心亦唔諗住行使認購權。呢個解釋相當合理，但原來除咗呢個原因，I.T.同事話仲有另一原因。
I.T.同事話，好多證券行其實都係一個pool咁去處理客人買入或者沽出嘅期權，就以上述例子，可能間行有好幾十個客都Short咗9月份行使價80蚊嘅滙控Call，如果有買入同樣Call嘅投資者行使認購權，間行會喺個pool度settle，到最後埋單計數，真係要take啲客嘅貨，佢哋一般會揀較活躍嘅舊客。
敏妮唔係好明，「吓，唔係應該揀新客咩，活躍舊客咪即係熟客，點會得失佢哋呀！」I.T.同事解釋：「一來真係take，通常都唔使take晒，二來活躍舊客熟悉期權運作，好接受啲貨會俾人take走。至於唔揀新客，係因為唔想趕客嘛。」
究竟係咪如I.T.同事所講，有機會見到做期權嘅證券界朋友，一定要請教吓。
溫敏妮
http://wanmanli.com/blogs/