港交所（388）行政總裁李小加發表「萬言書」倡設「資金池」，為本港人民幣產品提供流通量的創新建議，在財金界引起不少討論。
討論歸討論，行動最實際，美資行高盛睇完李小加六招谷「資金池」嘅建議，立即向客戶發出英雄貼，睇吓有幾多人對呢單嘢有興趣。真係唔講唔知，英雄帖發出冇耐，逾百中外基金同埋大客，紛紛表態話有興趣。
小加知道咁多人賞識自己，自然開心啦！即刻答應高盛出席午宴，向捧場客一一講解「資金池」對香港有幾重要。
高盛發英雄帖反應熱烈
華華收到料，恒生銀行馮孝忠嘅基金朋友聽完之後，立即講解畀阿馮知，馮孝忠一聽就知係好嘢，仲打電話畀港交所攞料，話要睇番有關「資金池」嘅料。就係咁，小加又多咗個知心友。
講開又講，華華早前同立法局議員詹培忠講開呢個「資金池」，順便問佢老兄關於小經紀嘅反應。
一句到尾，唔少細經紀行啲客都熱愛炒股，投資人民幣產品對佢哋嚟講呢，真係好睇唔好食，而代表金融界嘅立法局議員詹培忠，笑住同華華講，呢啲嘢短期係賺唔到大錢o架啦，但做人就應該要睇遠啲，呢件事對香港好，應該係要做嘅。
李華華
mailto:[email protected]