童年時鐵甲奇俠嘅回憶可能比唔上蜘蛛俠或蝙蝠俠，但以改編漫畫電影嚟講，鐵甲奇俠還是有股吸引力。本周新推《鐵甲奇俠2》再唔係隻揪隻，而係機械人大混戰，大量對戰場面加上CG特技，Blu-ray又可以大派用場，感受聲畫的震撼，包你震到暈一暈。
記者：符樂
CG特技 必睇！
今集最唔同嘅係鐵甲奇俠唔再孤軍作戰，佢老友洛德上校會着上名為「戰鬥神器」的銀灰色重型盔甲同佢一齊打壞人。開波半個鐘，今集嘅壞蛋「喪鞭」便出場，佢拎住兩條高壓電鞭係咁鞭，一鞭劈開一架方程式賽車，成為一個小高潮。後來「喪鞭」利用為增強美國國防而製造的海、陸、空軍無人駕駛「鐵甲戰隊」，對鐵俠狂轟，一輪你追我逐，槍林彈雨，幾乎每個鏡頭都係CG特技。最有印象都係一幕東尼被軍隊追捕，東尼出勁招對付軍方機械人，一爆之下，零件四飛，若然觀眾有個靚電視，可以見到好細緻嘅零件表面，電視靚唔靚，真係一個鏡頭睇晒。
環迴音效 夠投入
至於音效方面，更係Blu-ray發揮作用嘅時刻，爆炸、掃射、高速飛行，聲畫俱備，最值得一讚係環迴音效非常正，聽住耳邊子彈擦耳飛過，睇碟份外投入！除咗聲畫外，仲記得睇埋東尼騷哥利，轉行玩科技仲搞個「StarkExpo」實景加CG而成的會場，科幻而真實勁過上海世博。東尼手上一堆擬真嘅科技產品，例如透明掌上電腦，可以用嚟遙控另一個芒；立體影像掃描可將整個電腦描繪圖放大縮細。估唔到睇碟都可以預覽未來科技喎。
買碟送Figure
家買《鐵甲奇俠2》Blu-ray或DVD，剪低包裝上嘅貼紙連同收據答中問題，就可以參加抽獎，贏得鐵甲奇俠MK-VI1:6限量版珍藏人偶或MK-VI1:4特別版珍藏半胸像。
Profile
類型：改編漫畫電影
畫面：2.35:1
音效：AC-3、DolbyDTSSurroundSound
特別收錄：StarkExpo炮製博覽會盛況、概念插圖大滙演、刪剪片段
