左丁山祖母年青時精明能幹，香港淪陷時回鄉避日本人，晚年雙眼失明，不願再回香港，於是在擔驚受怕之下捱到八十幾歲。當年鄉下生活，朝不保夕，又怕跪玻璃，受清算，家產盡失，我地根本唔識得點解一個人會漸進式失明，亦都冇錢延醫診治。究竟點解人老了，如錢穆先生，如左丁山阿嫲，會失去視力嘅呢？據家嘅醫學常識，可能係白內障、青光眼，黃斑病之故，但以幾十年前嘅有限知識，相信亦醫唔番。
有此童年陰影，左丁山每年勤力驗眼，不敢怠慢，每次到眼科醫院見大教授，已經預咗要排隊起碼兩小時，故此驗眼之日，例不約朋友吃午飯。呢日去到眼科醫院，搭之時，擠逼異常，內擠逼到好似係早上八時嘅九龍塘地鐵車廂，內多數係老人家，可推測到，香港人口老化，眼病逐漸成為一個重要病源，需要不少公共資源以應付之。莫講話睇街症之人多到不得了，我地專程去睇大教授，當作私家症之病人，亦坐滿診症室。幾年前有一位闊佬在此等到發脾氣大聲講：「點解我要等咁耐？」左丁山細細聲提醒佢：「阿哥，有兩位爵士坐喺前面排緊隊呀！」闊佬雖闊，地位與兩位爵士相差好遠，立即收聲！
見完大教授，已經係一點半，諗起沙田馬會凱旋廳新裝修完畢後，開咗一個NoodleBar，於是立即坐的士入去食番碗麪先，一去到就見到建築T與朋友在，建築T要左丁山坐埋去一齊食牛肉拉麪，讚不絕口。聽講拉麪師傅曾上北京，在北京馬會會所學習如何做拉麪，如何煮麪。北京馬會會所凱旋廳之蘭州牛肉拉麪，聞名京城，達官貴人極為欣賞，沙田馬會凱旋廳之牛肉拉麪用足料，無味精，碗湯可以飲埋，過癮之至。建築T話佢在山光道打完網球都要揸車到沙田會所食麪，可見其吸引力。
上星期三夜馬，亦見到院士W夫婦特登來此吃麪，兩人不是馬迷，吃完即走，左丁山同院士W開玩笑：「嘩，院士喎，原來有錢收嘅。」院士W立即喝住：「喂，呢度係香港，不容任何非法行為！」佢當然知道左丁山想講乜─即係內地打假專家方舟子俾一位泌尿科教授肖傳國以十萬元人民幣買兇襲擊之故事。肖傳國因不能當選中科院院士，對方舟子懷恨在心，出此下策，被內地公安緝拿，內地社會為之嘩然，香港啲院士更加視以為奇恥。內地學者榮升院士之後，就有不少特權，貪污院士奉旨收銀，該煨也。
（按：昨日談及一季七捷馬「歡樂繽紛」，實「盈彩繽紛」之誤，謹此致歉。）