家RMVB多媒體播放器大行其道，一部幾百蚊就有交易，用家可以經互聯網share啲家庭影片，好鬼方便，但係市面買到絕大部份係內地雜嘜牌子，質素冇乜保證，好容易過熱死機。台灣電腦周邊產品製造商KWorld，最近首次進軍多媒體播放器市場，一口氣推出三款多媒體播放器，畀消費者多個選擇。
KWorldM200賣598元
KWorld本港代理匯科系統產品總監FC話，家市面見嘅內地牌子播放器，啲畫質麻麻，用電腦芒睇算係唔多覺，駁去大電視睇，係人係鬼一目了然，畫面起晒格。KWorld見啲影音迷要求越嚟越高，所以推出中高檔嘅全高清多媒體播放器M200，備有HDMI輸出端子，可以播放1080p全高清畫面。部機幾乎支援晒唔同電影格式，好似RMVB、MKV、AVI等，「就算係高清手提攝錄機拍嘅高清格式都play到」。
小妹有部攝錄機拍MTS格式全高清影片，但只可以經電腦嘅軟件播放，得19吋芒，幾高清都冇用啦。小妹用部M200駁去42吋嘅全高清Plasma，部機真係讀到小妹拍嘅旅行全高清片，喺大畫面好清好震撼。
FC話，M200仲可以透過LAN或者WiFi支援UPnP（DLNA）協定檔共用播放，就可以連接書房嘅電腦播片，售價$598。
另有M100同M102入門級型號選擇，前者用色差線輸出，後者可以用到HDMI線輸出支援到720p高清影片，售價分別$249及$299，包兩年保養。查詢：31736080。
電郵：mailto:[email protected]