中國船長詹其雄到釣魚台捕魚，被日本海上保安廳艦艇攔截逮捕，激到唔少港人生蝦咁跳。八方同事上月中收到市民陳先生報料，話十月一日早上11點會到遮打花園示威，向全世界宣示釣魚台係屬於中國呢個歷史事實。
呢位仁兄仲實牙實齒話到時有30人參加，講到不見不散咁款，八方身為中國人梗係支持，噚日準時到達現場睇吓乜嘢人咁熱心，點知保釣義士就見唔到，外籍傭工就有唔少。八方以為保釣義士改咗去日本駐港總領事館遞信，點知又係人影都唔見，只係見到幾個阿Sir喺附近巡邏，佢哋都話冇聽過有示威遊行。
保釣義士突然隱形，唔知同日方上星期放咗船長有冇關，八方當然希望港人保釣決心唔會咁快就熄滅。