九巴由噚日開始嚴打司機酒後駕駛,會派人突擊做酒精測試,被抽中嘅司機就要「吹波波」,證實完全無酒精至可以開車。九巴重視安全原本係好事,但唔少司機大佬就覺得有壓力,好擔心一唔小心用咗含酒精嘅漱口水,或者食咗粒酒心朱古力,就隨時一身蟻,連份工都不保。
大部份司機好自律
汽車交通運輸業總工會第一副主席鍾建華話,較早前已經向九巴反映過,對新措施有保留。家法例對酒後駕駛嘅罰則已經好重,相信大部份司機都知道,飲酒開車要負上好嚴重嘅後果,過去十幾年,九巴司機觸犯酒後駕駛嘅個案只有幾宗,顯示九巴司機好自律,唔明白九巴點解唔信任班司機。
九巴發言人話,新措施係為咗保障巴士乘客同其他道路使用者嘅安全,九巴一向實施酒精零容忍政策,司機一經驗出體內有酒精,就算好少,都一定唔可以開車,並交內部部門處理,而每個個案都會視乎情況而定,司機毋須擔心。