每日早上十時零幾分，行經興瑋大廈，等過馬路，經常遇到三位熟人，一位就係大馬主L，佢養馬幾十年，逢跑馬必在馬場出現，上星期佢隻「威馬加鞭」先至跑入冷位置，佢位公子隻「歡樂繽紛」就巴閉咯，上季一口氣贏咗七場，創下贏馬歷史紀錄，即使強如「精英大師」，過往都只係一季贏六場啫。第二位就係退休賓架C，退休後專做義工，淨係做中大校董，睇住中文大學盤數與支出，已經用咗佢唔少時間，第三位就係醫生K嘞，係心臟科專家，連名下駿馬都命名為「心歡笑」（KingofHearts），若有所指噃。呢三位老友點解經常在十點幾左右在興瑋大廈外出現呢？好容易解釋啫，在陸羽飲完早茶，行返寫字樓開工吖嘛。
呢日見到醫生K，佢叫左丁山參加「世界心臟日」活動，就係十月三日星期日，香港心臟專科學院在跑馬地馬場有大型活動，包括三千幾人參加健步行，心臟健康嘉年華，一千名中小學生參加「世界心臟日」繪畫比賽，佢講到：「你日日在外食飯，要注意保護心臟健康呀！」有乜貼士呢？醫生K贈予一份單張，講三低一高，就係食物要低糖、低鹽、低油、高纖維，每天食物最好包括：三至六份五穀（即約一碗飯、二碗粥、二塊方包），二至四份生果，一至三份肉、魚、蛋及豆類，一至二杯奶及奶品類，四茶匙油糖鹽類，六至八杯流質飲品。
咦，左丁山好似日日食到超晒標喎，如何是好？醫生K話：「步行啦，跑步啦，跑步十分鐘等於步行一小時，但要慢慢嚟，唔好一開始就催谷。每日行半小時就幾好咯。」步行啫，易到極，一於日日步行半小時，但如果不幸突然間有親友發生心臟病，如何是好？醫生K又俾一張貼士紙，上面寫明心臟病黃金一小時自救法，急急收埋先，心臟病發後頭六十分鐘必須盡力搶救，有五個步驟：（一）急call救傷車；（二）盡快聯絡相熟醫生，提供急救指示；（三）若有三酸甘油（TNG），即時放一粒於舌下，或有阿士匹靈，即服一粒；（四）盡量保持鎮靜；（五）若感到暈眩，可連續用力咳幾聲，刺激心臟恢復血液循環功能，所謂黃金一小時，就係話，愈早搶救，死亡率愈低，愈係阻滯，死亡率愈高。