洋版孫悟空　棒打機械怪獸

洋版孫悟空　棒打機械怪獸

西人版《龍珠》後，將會有西化《西遊記》遊戲《Enslaved：OdysseytotheWest》推出。雖然故事同場景都同原著無乜關係，但主角手中嘅如意棒，仲有激光版觔斗雲，加埋個頭戴住個箍，都極有西遊Feel。大棍車落啲機械人度乒乒乓乓，連續技最後仲有完結特別動作，打起來又型又爽。

文：阿洛

未來幻想西遊記

由曾製作《玄天神劍》嘅NinjaTheory製作，遊戲保持壯闊生動嘅背景，以及流暢耍帥嘅動作。由英國知名小說家AlexGarland任編劇，雖則話改編自中國古典名著《西遊記》，但故事背景設定在150年後的未來，都唔知仲有無西經俾佢哋去取。經過數十年嘅戰亂饑荒，留下大堆當兵器的機械人。而隨住戰爭過去，機械人明顯已不受控，到處破壞殺人，令到世界崩壞，死剩嘅人類亦唔多，仲要被奴隸販子操控，你話幾慘呢。主角就係狂野好身手嘅Monkey，以及對科學極有研究嘅Trip，而兩人成功喺奴隸販子手中逃脫後，Trip利用Monkey頭上頭箍，操控佢找尋回家道路，而相中呢個荒蕪地方，就係150年後嘅紐約。

■阿Monkey手中嗰粒好似龍珠，唔係玩到咁大嘛？

■孫悟空、豬八戒都有，咁女主角係唐僧還是沙僧呢？

■巨型機械獸好兇殘，見人就想殺，遊戲內都有唔少壯觀場面。

力拼巨型機械怪

場景會喺Monkey行動中變化，玩家要保護Trip不受傷害，同時亦有不少關卡係需要男女主角合作過關。去到遊戲中段，出現一個大肥佬，好明顯係扮演豬八戒呢個角色。敵人方面，遊戲所見全屬機械人或獸，有大有細之餘，仲有防護罩，可惜嘅係暫時未見到機械版白骨精、蜘蛛精，最好就有埋牛魔王啦。

■女主角係電腦天才，估計未來除人類外仲有其他生物。

■主角除如意棒外，隨住故事發展仲有其他武器。

■緊箍咒，問你怕未？仲敢唔敢曳？

■連續技動作流暢有型，而且表達出嗰份力量感。

■完結技都係扯電線，由於係機械人關係，血腥味唔濃。

咕嚕變身孫悟空

與其話主角似馬騮，不如話佢似猩猩多啲。動作敏捷嘅佢，原來係由電影《魔戒》系統扮演咕嚕嘅演員AndySerkis做MotionCapture以及遊戲嘅副導演，所以畫面角度都極富荷李活電影感。加上廠方研發嘅BodyBlendShapeSystem，角色動作像真度極高，除了連續技外，還會有類似《GOW》嘅完結技，同時亦可腳踏新版觔斗雲，或者擅用場景中嘅炮台開火。

■某些機械人會有防護罩，更難打破。

《Enslaved：OdysseytotheWest》

主機：PS3/XBox360
廠商：NinjaTheory
類型：動作
人數：1人
發售日期：10月5日