消費blog:去金門免費踩單車

消費blog:去金門免費踩單車

如果嫌台北食到滯、玩到悶,小妹推介大家去金門,包保玩過番尋味!小妹早前同成班friends去廈門參觀世界文化遺產「華安大地土樓群」,順道坐船過埋金門玩兩日,船程只係一個鐘多啲,仲快過由台北搭飛機過去。
金門之前係軍事重地,但自從01年「小三通」實施後,金門嘅神秘面紗終於揭開。講咗咁耐,究竟金門有乜玩呢?金門大約150平方公里,面積同大嶼山差唔多,而且車少路直,最適合踩單車環島遊。金門有10個免費單車借用站,即日借還,好鬼方便。

別錯過「金門三寶」

當地旅遊小冊子設計咗五條單車路線,全長13至18公里不等,需時三至五個鐘,跟住踩就唔驚蕩失路啦!想睇歷史古蹟,可以喺莒光樓借車,順便登上樓頂欣賞開闊嘅金門景致,沿途路經文台寶塔、翟山坑道同埋牧馬侯祠等國家級古蹟。想睇湖光山色,可考慮由金沙車站出發,繞經榮湖、田墩海堤、山西等地,秋天仲有大片高粱田美景。唔想踩單車,可以選擇睇雀,慈湖、太湖一帶都係觀鳥熱點,稀有嘅品種,例如長腳鷸、黃眉柳鶯都可以搵到。
最後提一提大家,金門嘅高粱酒、麪線同埋炮彈刀堪稱「金門三寶」,另外唔同口味嘅貢糖,都係手信之選。

電郵:mailto:[email protected]