馮仁昭四圍超：
飛輪海騷哥利　吳尊斷獎座瘀皮 - 馮仁昭

台灣組合飛輪海噚日喺九龍灣舉行簽唱會，有2,000個fans到場支持，原定下晝2點開始嘅活動，足足遲咗個半鐘先開始。四子一出場就用半鹹淡廣東話狂冧fans，汪東城仲成日扯起件衫騷身材！
吳尊呢個月10號31歲生日，大會送上蛋糕同佢預祝，佢話正日想同屋企人去旅行慶祝，但係緋聞女友楊丞琳就冇份喇，又話楊丞琳唔識煮嘢食，所以應該唔會收到佢整嘅蛋糕喎。

周筆暢挑戰事業線

飛輪海將呢兩年喺中港台攞嘅音樂獎座攞出嚟騷吓哥利，點知吳尊唔知係咪太用力，竟然將其中一個獎項整斷咗，好鬼瘀皮。
另外，周筆暢噚日喺海港城為新碟《i魚光鏡》舉行簽名會，烈日當空之下都有近百粉絲排隊，問佢轉咗女性化造型慣唔慣？佢話：「我唔鍾意一個style到底，fans就有啲話鍾意，有啲接受唔到。」
筆筆又話家見到靚裙都會買，不過講到會唔會露事業線，佢就話：「低胸裙家都未得，可能過一排我會愛上。」筆筆聽晚將會同張芸京做新城音樂會。