巴黎車展直擊：福士Passat反常態　一腳踢開門

2010巴黎車展今日正式開鑼，來到福士集團，幾大品牌夾在一起依然佔地最多，當中亦以VW最多車款睇，重頭戲是大改款Passat，變樣加豪外，更體貼一班Shopping族，踢下隻腳就開到尾箱，認真唔「踢腳」！

記者、攝影：徐影龍

輕提腳開尾門

VW今次最勁的重頭戲，當然是全新第七代Passat登場。Passat多年的總銷量已超越1,500萬架，新款曝光前，網上傳聞多多，今日見到廬山真貌，遠望觀感上高級貴氣了，全因車頭車尾的設計，融入了同廠兼百萬身價的Phaeton風格，還加入自動停車及更多安全科技。但論最好玩之處，首推尾門設有動作偵測，當你雙手忙於抱住Shopping戰利品或搬緊嘢時，毋須手忙腳亂搵車匙及開尾門，只須向車底輕輕提腳，尾門即自動打開，相信呢個新Function都幾受女士們歡迎。

■袋住車匙輕輕提腳，尾門就會自動打開，雙手拎住幾多嘢都唔驚。

■TwoTone內櫳配搭，加埋白線車邊，感覺更豪華高級。

■旅行車款比Saloon版稍長，達到4,771mm。

耗油之少令人驚嘆

Passat另一驚喜是燃油效益提升了19%，1.6LTDI版更低至4.1L/100km，即耗油只約港幣五毫幾子！於11月中在歐洲先行開賣，香港則待定。

極惡蠻牛僅重999kg

巴黎車展前，林寶Lamborghini玩神秘，6張新車宣傳相全部屬近鏡，搞到車迷心癢難耐。這款名為SixthElementConcept，繼續大玩林寶碳纖取向，全車偷輕至999kg，仲輕過Lotus最新架Evora。啞黑車身配頭冚上兩大紅三角，招積度100%，引得在場人士舉機喪影。車身輕成咁，配上5.2LV10引擎肯定嚇親人，極速可達350km/h，0-100km/h僅僅2.5秒！