"升降凶間嚇親波友"
一向欣賞靠拍《鬼眼》揚名嘅印度「鬼」才導演，上周六點都要捉人去睇吓佢監製嘅《升降凶間》，低成本之作得80分鐘，可能幕後老闆驚佢嘅作品繼續跌watt，唔敢泵太多水俾佢玩，咁樣提高番個值博率未嘗唔係好事，唔似幾年前套《禍水》咁，全世界中伏。有節目唔得閒刨波，自己喺本欄叫大家買曼城冷W同長期推介嘅鯨魚都係小注；放重心嘅黑池，補時至94分鐘失守，也是小注；不過3選1揀重心，放到上標題即輸，好邪啊！冷風延至周日，熱門客驚過睇鬼片。
"翻不到盤成肚氣"
去到梳打埠賭場，無論玩百家樂定係骰盅，個個都望住將盤路紙，好似好有心得；賭波，好多人一樣有咁嘅想法。上個禮拜六熱門客近乎全軍覆沒，禮拜日3場英超，硬要追番口上盤，大不乏人，尤其有好多人嘅至愛曼聯做頭關，唔理作客毫無值博率，馬會㩒到個W得1.38倍照買。我喺擂台推介冷博保頓W，冇想過之前一日開得太多下盤，冇quota，兼加注買埋[+1]；其實作客讓咁多，除非你係一個盲目嘅波友，否則此欄一直勸大家重心必不在客隊。不過紐卡素守英超尾門，迎史篤城，個主W有得分，理解好多人都想追到個上盤求安心，結果下半場逆轉先勝後敗，呢鋪大家應該埋唔到數。
"鹿角鋼W追吓鯨魚"
玩波馬股票也一樣，天天誘惑滿佈，有時要艱苦經營，有時要持之以恒，耐心吼準出擊才會見到陽光，這種修為我每天也在學習。賭馬興趣仍濃，但時間有限，只專注研究大馬房出擊。大摩季初偃旗息鼓，等到上次開始有出擊手影起孖，昨日國慶日擺晒陣，可惜博失幾場。今天冇馬賭，大家下午又會將視線放喺日聯度，上次堅持再推鯨魚，作客反勝5:1，我都估唔到佢哋咁勁，冠軍已在眼前，今對弱旅仙台，又唞一個禮拜出場，賠率雞肋，我也是建議大家攻波膽，3:0，4:1。真係要出手，單W串射唯一爭標對手鹿島鹿角，心跳散晒，1.7倍誠屬下午精選，繼續俾隻鹿追吓鯨魚，季尾好睇啲。
"博懵吼黑池12倍W"
忍到現在，仲未裝畸寶，好友笑我忍唔到幾耐，都啱嘅，趁打埋呢兩日大場面，有超過10日淡靜嘅國際賽期，問吓街邊啲sales個價係咪平咗先扑槌。周中忍到車仔同阿仙奴踢歐聯先出手，屋企冇得睇但係佢哋成功翻盤我就大豐收，聯賽同盃賽係兩個世界，大家咪用同一心態待之。聽日啲波戲碼強得多，阿仙奴作客近年贏唔到嘅車仔，個個識話杜奧巴爆廠格，個W得1.6倍已完全反映晒，我當然會小注，一季唔會有幾次機會嘅阿奴4.7倍W，希望韋舒亞繼續扮法比仔。重心，賭另一場英超利記對黑池，前者續劣必望國際賽前執靚番盤數，必傾力進取；但我認為黑池主攻有望入波，入球「大」必捧，再博小注12倍W，紅軍可能繼續唔掂，何況，賭錢始終係值博率行先。
語錄：賭波有幾強數據都好，也要從值博率出發，好分，自然可減注，壓力也減少，睇波賭波樂趣在此。