原來唔止煲呔，立法會主席曾鈺成都愛上玩iPad。噚日曾鈺成同傳媒茶敍時，自爆近期不時同身在海外嘅囡囡，透過iPad玩Scrabble，結果六度比拼各贏三盤，未分高下。
對貓自言自語
有人形容沉迷iPad好似上另類毒癮，曾鈺成用嚟增進父女情，其他人應該學嘢。另一最愛apps係「TalkingTomCat」，曾鈺成話家經常對住隻卡通貓講嘢，雖然只係自言自語，但聽到隻貓貓重複自己說話就會哈哈笑，鬼咁得意。
民建聯唔少擁躉都支持曾鈺成去馬參選「超級區議員」，一度稱考慮吓嘅曾鈺成噚日話，參選區議會要就好多街坊瑣事表態，同佢被要求中立嘅身份有牴觸。佢又話如果去馬，擺明係用嚟過橋選立法會，如此屈機好冇政治道德，除非個社會覺得咁做冇問題啦，佢自己就未必過到呢一關。
更加唔可以接受嘅，係若落選區議會，2012年又循地區直選出戰會好核突，曾鈺成閂晒後門，其他想選「超級區議員」嘅所謂重量級人物又點睇呢？