美式足球隊嘅更衣室，從來都係女性禁地。一支美式足球隊成50幾個男人，當佢哋練習或比賽後，成身汗走返入更衣室，間更衣室充斥陽剛氣息之餘，少不免四圍男人味，突然有個女士喺度又確係尷尬。
不過，墨西哥靚女記者莎恩絲（InesSainz、圖）為咗做好訪問NFL球隊紐約噴射機嘅4分衞主將馬克山齊士（MarkSanchez）報道，近期就隻身犯險，勇闖噴射機更衣室。莎恩絲呢隻小羔羊入咗狼群，少不免俾人言語間抽吓水。單報道出街後，就有人覺得莎恩絲被性騷擾，搞到噴射機球員要留堂接受女傳媒工作者協會同球會總經理嘅訓話。莎恩絲之後都解釋其實係誤會，佢自己都冇覺得受到侮辱或者唔尊重嘅對待。其實大家做嘢啫，大事化小最好啦。