小妹呢輪鍾意咗踩單車，買咗部20吋轆嘅小摺（折叠單車）放假同男友周圍兜風，既可trim吓雙腿嘅線條，又可以享受大自然，真係好健康o架。趁住假期，小妹又同男友晨早去吐露港單車徑踩車，早啲踩冇咁曬，今次仲踩到大學站試吓凱悅酒店中菜廳沙田18嘅六道菜brunch。
酒店坐擁吐露港無敵海景，坐喺中菜廳落地玻璃窗位置，外邊嘅山光水色一覽無遺。酒店助理行政總廚Christopher話，呢個brunch網羅咗沙田18嘅招牌菜，顧客都幾受落。頭盤脆皮燒花腩肉、明爐烤蜜汁叉燒、麻辣醬拌拍黃瓜。食落口，燒肉幾脆，黃瓜爽口帶啲麻辣味，好醒胃。
每位$250 最少兩位
第二道菜係廣東點心，蝦餃皇、燒賣、蝦春卷、素菜餃、煎蘿蔔糕。蘸啲佢哋自家製豆豉辣醬、瑤柱絲XO醬，特別好味。Christopher話，沙田18以東莞菜出名，brunch唔少得招牌菜豆豉角豆炒斑球、乾葱鮮竹撈芥菜、東莞炒米粉，「啲材料都係嚟自東莞」。
最後係雜錦甜品拼盤，大玩中西合璧，好有驚喜，包括有龍眼花巧克力餅、山楂奶凍、芒果凍布丁、杞子桂花糕。
中菜廳副經理Brad話，brunch係喺周六、周日同假期先有o架咋，早上10點半至下午3點，每位$250，最少兩位起，額外加多$80任飲鮮榨橙汁同汽水，或加$150任飲餐酒。
食到咁飽，小妹睇怕要一直踩到大尾督先得。
電郵：mailto:[email protected]