做區議員「區佬」一名，對好多人嚟講唔多吸引，但加咗「超級」兩個字就唔同晒，因為隨時攞十萬八萬票，有人形容民意認受性勁過幾百人小圈子產生特首，因此好多人躍躍欲試。反對區議會方案嘅公民黨，對參選「超級區議員」一直無閂後門，八方聽聞近日黨內討論擺位，其中一個說法係由梁家傑參選「超級區議員」，九龍東個位，就由幾個月前入黨嘅郭家麒接棒。
曾參選特首嘅梁家傑知名度高，選「超級區議員」冇難度，目前首要係搵番個好位選區議會。如果佢唔轉區，九龍東多中產嘅選區不外匯景、星河明居等屋苑，選擇無多。郭家麒落九東有啲優勢，因為對手冇乜專業人士，加上公民黨招牌搭夠，事半功倍。至於點解唔由余大狀出馬選「超級區議員」呢？據說有傾過，港島區由陳淑莊搭黎廣德，但呢個方案暫未有下文。