葡萄牙靚仔球星基斯坦奴朗拿度（C朗）今季喺皇家馬德里嘅表現，確係冇上季咁搶鏡，到目前為止都係入得嗰兩球，但場外新聞仲係咁多同咁精采。盛傳佢搵代母生嘅囝囝日前曝光，不過望落去，點解成個黑人咁嘅，唔通小C朗嘅親生媽媽係個黑人？
葡雜誌揭真身
現年25歲嘅C朗喺今年6月榮升做爸爸，但佢堅決唔肯透露小C朗媽媽係邊個，於是坊間出現好多傳聞，話係個美國女人，甚至係佢搵代母生。不過，有葡萄牙雜誌影到小C朗個樣，令人相信佢親生媽媽，可能係個黑人。雖則C朗成嚿炭，但以拉丁人嚟講佢膚色算白，佢嗰身古銅色肌膚係曬番嚟。而我求大俠見到小C朗張相，如果唔係由C朗媽抱住，仲以為老虎仔活士先至係佢爸爸㖭。
就算小C朗嘅親生媽媽唔係黑人，斷估都唔會係白人，否則小C朗佢冇可能成嚿小黑炭咁。係呢個moment，令我求大俠諗起一首歌，就係「如果太多牛奶味，朱古力味冇碇企，等到朱古力味返番嚟，牛奶味又唔爭氣！」
C朗家陣多咗條化骨龍要養，梗係要勤力啲，拍多幾個廣告搵奶粉錢啦。而由佢代言嘅手錶廣告日前就出街，喺廣告裏面佢當然少不免show吓佢引以為傲嘅嘢，就係佢嗰身古銅色肌膚同埋相當結實嘅胸肌及腹肌。講真，佢又真係幾正，連我求大俠都要講一句「簡直迷倒不少女性，令不少男性羨慕又妒忌。」
迪馬利亞炒車冇事
另外，同C朗一齊效力皇馬嘅阿根廷中場迪馬利亞，禮拜二喺歐聯入致勝球幫球隊贏法甲歐塞爾1:0。返到西班牙後佢喺禮拜三即時約女友去玩，唔知係咪做咗贏波功臣後興奮得滯，搞到揸車時一個唔留神而發生交通意外。雖則佢嘅座駕就損毀嚴重，但好彩佢同女友都冇事，算係不幸中之大幸。