【本報訊】根據自行分配學位的計分準則，學童宗教信仰如跟辦學團體相同，則可獲五分。有教區人士建議取消這五分，以免家長為入名校不擇手段「自欺欺神」。
天主教香港教區一位處理教育事務的匿名人士稱，五分宗教分一早便應取消：「教會當初想收多啲教友入學，唔想純靠攪珠，但係制度沿襲落來，出現咗一啲唔公平嘅情況，變咗學校收生純粹取決父母兄姊關係，而唔係睇學生能力。」
該匿名人士指出，一些家長為送子女入讀教會名校，不擇手段；有家長教友學道理時總是提出能否與子女一同受洗，藉此取得寶貴五分。
「好多教友唔係真心信主」
教區也不用擔心取消了這五分而流失教友，他說：「家嘅教友好多都係掛名教友，唔係真心信主，反而取錄非教友子弟，可以向更多人傳播福音。」
本身也是天主教徒的選校專家趙榮德則說，宗教分深受家長重視：「因為呢五分係家長唯一可以主動爭取返來嘅，其他分數例如學校職員、兄姊同校等等，係冇得改變嘅事實。如果連呢五分都冇咗，家長唔知有乜好做。事實上，好多人都要靠呢五分送子女入名校。」