餘下任期唔夠兩年，特首煲呔似乎已經倒數在禮賓府的日子，有意無意間為自己盤點工作，講完自己只係禮賓府過客後，又有機會話當年。噚日煲呔喺facebook上載一條短片，透露做公僕40幾年心路歷程，話做特首雖然係人生最大榮耀，不過講到最過癮，都係當年喺沙田做民政專員嘅好日子。
有網民問煲呔，如果時光可以倒流，畀兩年時間佢回到過去，佢最想做番邊一份工。煲呔梗係唔想再做「孤獨推銷員」啦，至於做政治家有幾開心，大家有眼睇。佢亦好坦白，話好懷念喺離島理民府工作嘅日子，因為當時可以喺東涌、大澳、長洲跑山跑嶺，幫村民排難解紛、修橋鋪路，覺得真正幫到老百姓。
當年駐沙田建樹多
後來佢被保送去哈佛進修，回港後派去沙田做民政專員，煲呔話喺呢個職位得到最多回報，因為識到好多朋友，幾乎每日都接觸到市民，真真正正做到政績，如果可以回到過去嘅話，餘下兩年時間，佢最想返去沙田做民政專員。堂堂特首開到口想降級做民政專員，乜呢個位真係咁難坐咩？
煲呔對沙田有獨特情意結，幾個月前「起錨」都要到沙田嗌口號，皆因佢當年確係對建設呢個新市鎮做咗好多工夫。沙田區議會主席韋國洪當時仲係o靚仔一名，只係鄉事會委員，話最記得煲呔當時開會或同地區人士見面，口頭禪係「仲有乜可以做？」，成日都想有新搞作大展拳腳，現時沿城門河兩岸嘅單車徑，就係由煲呔提出，成功游說庫房畀錢而建成，家伸延到大埔、馬鞍山，成為沙田特色！家有麥理浩徑、衞奕信徑，日後有冇人提出命名沙田曾蔭權單車徑呢？
背後被謔「大軍閥」
煲呔另一沙田政績，係促成沙田八佰伴開幕時，商家贊助喺城門河放煙花，好多老街坊仲記得當年逼爆睇煙花盛況。有鄉紳同八方講，80年代初未有區議會選舉，基本上冇乜政治爭拗，民政專員雖然只係小官，不過喺地區上卻形同「山寨王」，即使唔可以隻手遮天，都可以擺吓官威，因此當年佢哋私下叫煲呔做「大軍閥」，形容佢有時都幾一言堂，未必聽意見o架。
mailto:[email protected]
