王喜日前自爆因食老友陳志雲家中齋菜變肥喜，結果要做纖體療程減肥，原來他還去曬太陽燈，王喜謂會邀白淨志雲加入曬燈族，望他變色轉運。有齋齊喫、有燈齊曬，兩個男人互相扶持，事事分享。王喜更笑言要努力搵錢，盡力幫補志雲。
無綫總經理陳志雲涉貪案未了，愛將王喜有情有義，誓言會繼續陪伴陳總走下去，更甘願賣樓籌錢助老友打官司。近日王喜藉《天天天晴》效應，外出接job密密做，分別為男士美容纖體中心及曬燈店擔任代言人，據悉兩job各有六位數字酬勞落袋。
曬黑轉運
近期將身形操得甚弗的王喜，日前獨自現身銅鑼灣鬧市，身穿窄衫及短褲的他現結實胸肌，途中更被數名着制服的女店員攔路拉着他拍照，王喜有求必應，跟她們搭膊頭輪流合照。其後他到附近的曬燈上樓店perfecttan，內進後即熟稔地於櫃位攞助曬劑及毛巾，接着走進曬燈房，半小時後他離開房間，走到另一角整理儀容，於鏡前搽曬後護理劑及吹頭，繼而匆匆離開。
記者昨致電王喜，他表示因做了該公司代言人，故不時往該處曬燈，未知他會否建議志雲曬黑？王喜笑說：「我會，古天樂以前都係白白淨淨，曬黑咗運程就轉好。」
志雲繁忙
他又笑謂要俾心機工作，希望多接廣告幫補，那毋須賣樓也可幫助志雲。其實日前王喜出席活動時，已曾表示因常吃志雲家中的肥膩齋菜而變肥，幸接受纖體療程後，已成功踢走26磅豬腩肉。
王喜和志雲患難與共，未知近日志雲狀況如何？王喜說：「佢好好，好多嘢做，但做乜就唔公開。」對於李家傑斟洽收購無綫，王喜只說：「咁高度秘密，我就梗係唔知啦。」
採訪、攝影：葉雪、陳俊強
