噚日我求大俠提過，馬勒當拿（圖）呢幾日突然喺莫斯科現身，佢老人家更可能約咗隨巴塞作客俄羅斯嘅美斯見面，密謀重掌阿根廷國家隊。不過佢同美斯嘅合照未見到，我求大俠先睇到嘅係佢幫俄羅斯癌症兒童籌款，參加咗個類似幾年前電視播過嘅筋肉擂台射龍門遊戲。喺世盃已不時腳痕露兩腳嘅老馬，喺距離16米外嘅龍門分成10格，每格代表2.5萬至30萬美元嘅金額格仔施展百步穿楊，只要射中晒嗰10格，贊助商就會捐出100萬美元。就嚟60歲嘅老馬最尾都唔算太失威，射中部份格仔籌到50萬美元。馬勒當拿仲話對未能全中幫更多小朋友覺得好遺憾，既然係咁，老馬返到老家要練習多啲啦！