只要有睇過今屆世界盃，一定記得尼日利亞有個鋼門安耶馬。前日佢所屬嘅特拉維夫夏普爾主場負里昂1:3，場波雖然係梅開二度嘅米高巴斯圖斯做主角，不過安耶馬除咗上半場奮勇救出敵方一球窩利之外，完場前11分鐘又操刀射入12碼，係繼附加賽對薩爾斯堡後再次建功，就算係敗軍之將兼失3球，表現都唔太失禮。