飲啤酒唔係男士專利，小妹去酒吧或clubbing，間中都會飲吓啤酒，去親德國啱時間都會參加當地嘅啤酒節，氣氛一流。原來今年係德國慕尼黑啤酒節200周年，我知道香港馬會會有大搞作，下周三起舉行「跑馬地馬場十月啤酒節」，到時唔只有正宗德國啤酒同鹹豬手，仲有得睇德國傳統民族舞蹈、玩競飲啤酒同埋舉杯鬥耐比賽，睇嚟今年唔使去慕尼黑都可以玩個夠本喇。
鹽脆包直徑一米
馬會下個月6、13、20號，一連三個星期三賽馬日，晚上5時15分至11時正，將跑馬地馬場「啤酒園」打造成1810年的巴伐利亞城（現稱慕尼黑），全園藍、白格佈置，園內供應大量德國地道啤酒，幾十蚊一杯，又提供多款由德裔主廚BrunoBurg主理嘅慕尼黑傳統啤酒節美食，20至80蚊不等，包括烤鹹豬手、扒紐倫堡肉腸、德國肉卷配薯仔沙律、巴伐利亞蘋果卷等，仲有直徑一米嘅巨型鹽脆包，以及一個全港獨有嘅特大巨型啤酒杯型薑餅，到時唔食都一定要影幅相留念。
有飲有食之餘，小妹最期待係遊戲環節，佢哋每日第5場或者第6場賽事開跑前，都有「競飲擂台」，畀30蚊就可以參賽，鬥快飲一品脫裝嘅啤酒，贏咗仲有500至3,000蚊現金獎。
另外，又有考力度同埋準繩度嘅「推啤酒樂激鬥」、鬥耐力嘅「舉杯耐力戰」。我自問唔夠力，但睇吓啲大力士玩都應該幾過癮。
總之閣下如果夠18歲嘅就可以免費入去馬場，感受吓啤酒節氣氛，至於賭唔賭馬就悉隨尊便喇。
電郵：mailto:[email protected]