爭產案華華見得多，但獄中爭產比較少見。08年因為提供非法回佣及串謀詐騙，被判入獄3年幾嘅珠寶大王謝瑞麟，以個人身份，向高等法院入稟，要求向同樣坐緊監嘅仔仔謝達峰，拎番上市公司謝瑞麟珠寶（417）嘅股份。入稟狀話，謝瑞麟指控謝達峰同埋佢控制嘅公司，違反信託責任，要求謝達峰將謝瑞麟珠寶股份，轉番晒俾謝瑞麟。不過，究竟成件事詳情係點，入稟狀無講清楚。
白手興家嘅謝瑞麟，97年一場金融風暴，令佢嘅投資損失不菲，最後係2000年申請破產。當時謝瑞麟持有上市公司嘅股權，因為私人債務問題，抵押俾瑞士聯合銀行，最後呢批股份輾轉落入謝瑞麟前任董事劉竹堅手中，跟住再由謝達峰買番。未知今次謝瑞麟入稟告個仔，係咪同呢一件事有關。
李華華