憑電影《心魔》成為7料影后的惠英紅，演技毋庸置疑，演慣大好人的她這次在無綫劇集《公主嫁到》有所突破，首次扮演為權為勢奸到出汁的韋貴妃，凌厲眼神更嚇怕網友，她自爆全靠兩層假眼睫毛雙倍添霸氣。今晚播出的一集，韋貴妃下場悲凉，將會自盡身亡，惠英紅恨不得被觀眾鬧爆，這才證明她演技入肉。撰文：比華利
宮中險惡，妃子間不惜爭寵求存，《公主嫁到》中由惠英紅飾演的韋貴妃，甫出場已與三公主佘詩曼針鋒相對，近日劇情高潮迭起，韋貴妃誓要把三公主置諸死地，今晚播出的一集還會交代韋貴妃惡人有惡報，失權失寵，為了令所愛的皇上終身歉疚，韋貴妃會在眾人前自盡，了結悲慘一生。
一口氣背六頁紙
惠英紅首次挑戰奸角，花了不少時間和心機鑽研角色，尤其死到臨頭的那場重頭戲，惠英紅表示劇本長達六頁紙，她特別要求《公》劇監製梅小青讓她一氣呵成演出，結果她順利考牌成功。
惠英紅日前在尖沙嘴接受訪問，她大談自盡的戲份：「我自己拍完呢場戲，鬆一口氣，我見到燈光師都睇到眼濕濕，因為對白交代我喺深宮生活，看似榮華富貴，實質有權冇愛，性格變得嫉妒極端，為咗逼走同我爭寵嘅妃子同公主阿佘，獨領天下，我嘅角色越變越奸。」惠英紅同情韋貴妃一角，她說：「呢個角色雖然好討厭，但當佢臨死前交代自己嘅內心世界後，觀眾會覺得心酸。」
眼神凌厲霸氣
《公》劇熱播期間，惠英紅一直有上網到討論區，留意網民意見，她說：「有網民話我嘅眼神好凌厲，佢哋話有啲怕咗我。大家越鬧我越開心，做奸角最怕冇人鬧。」當然發自內心的演技是多年經驗，但惠英紅表示也不得不讚化妝師替她設計霸氣十足的眼妝，她說：「為咗增加眼神霸氣，我特別黐咗兩層嘅假眼睫毛，眼皮會比較攰。」結果出來的效果人人讚靚之餘，又可加強凌厲眼神，惠英紅認為辛苦完全值得。
惠英紅讚《公》劇監製梅小青知人善任，她說：「小青姐上次安排演員演《宮心計》都恰到好處，出嚟效果好好，但佢今次大膽將演員角色反過嚟，忠變奸，奸變忠，將演員唔同嘅一面發揮出嚟，佈陣一流。」
問到惠英紅拍《公》劇的難忘事，她即數大公主陳敏之失心瘋一幕，身為韋貴妃的她要沒收大公主身上飾物趕她出宮，當時陳敏之太投入，頂着超磅頭飾，又要裝瘋失控，無情力扭動身體時出現頸骨移位，惠英紅說：「我哋拍呢場戲時，我作勢行近搶耳環，佢一轉身就聽到『肋』一聲，原來傷咗頸骨，好彩最後冇事，如果唔係我就好過意唔去。」
服裝：Moiselle 場地：麗景酒店
《笑聲之最》
最好笑同劇男演員：陳豪
「我從來冇睇過陳豪咁嘅類型去演繹一個角色，佢將一啲西方演繹技巧放入古裝入面，敢於挑戰自己，出嚟效果好搞笑又創新，值得一讚。」
最好笑同劇女演員：佘詩曼
「阿佘個刁蠻公主本來好討厭，但佢演得好可愛，好得人鍾意，仲有啲位佢演起嚟真係想『舂』佢幾槌o架。」
最好笑自己演出的一幕：向公主晒貢品
「我演嘅貴妃妒忌心好重，同三公主阿佘最唔啱，有一場戲講我向佢晒皇帝送畀我嘅珍珠貢品，展示自己幾咁得寵，點知阿佘駁嘴話呢啲珍珠啱有過好多人生經驗嘅人，擺明寸我年紀大，我即刻變臉。」