如果大家好似求大俠咁，有啲掛住羅馬里奧同白必圖呢兩個森巴名將就啱喇，因為遲啲好可能喺國際新聞見到佢哋嘅風采。講緊嘅係呢對昔日球壇嘅夢幻組合，最近都搶攻政壇，參加咗嚟緊星期日嘅巴西大選。聽講羅馬里奧所屬嘅政黨仲同總統盧拉關係密切，假如羅馬里奧選到做國會議員，以佢嘅知名度，遲吓做巴西總統都唔係完全冇可能！
據求大俠所知，其實羅馬里奧密謀做政治家都有差唔多成年時間，起初大家都以為44歲嘅佢會由地方議員做起，點知佢原來從政同踢波嘅野心一樣咁大，一參選就瞄準國家級嘅國會議員席位。羅馬里奧今次參選，就以照顧貧窮及殘疾兒童為競選政綱同旗號，喺近期一次落區拉票時仲話：「我喺貧民區出世同長大，所以我最清楚呢班小朋友需要啲乜！以往喺球場上，我用盤扭同入球帶俾巴西人歡樂；家亦係時候證明我可以喺政治舞台做出相同嘅貢獻。」羅馬里奧嘅演說慷慨激昂，若然求大俠係巴西國民都想投佢一票。
總統盧拉幫手拉票
聽小道消息講，羅馬里奧加入嘅巴西社會黨同總統盧拉嘅執政勞動黨已聯成一線，有執政黨幫手拉票，羅馬里奧贏出呢次選戰機會甚高，可以講踩咗一隻腳入國會。
至於入波鍾意扮抱仔慶祝嘅白必圖，46歲嘅佢今年教國內丁組球會阿美利加被炒魷後，就有感社會充斥貪污、謊言同醜聞，決意轉行搞政治，仲加入咗民主勞動黨，今次大選會喺里約州議會出選議員。而白必圖嘅競選承落同羅馬里奧都有啲相似，就係教育政策更加着重體育課程，同埋為培養2016年里約熱內盧奧運選手、爭取投入更多資源。
求大俠諗落呢對「7.11」孖寶以前場上咁合拍，嚟緊從政如果有實績支持，將來大可再拍檔選總統，成為巴西政壇夢幻組合。
羅馬里奧與白必圖這對夢幻組合，在94年美國世界盃決賽周發揮最強威力，前者射門觸覺敏銳，後者擅於走位；8強巴西3:2淘汰荷蘭打開紀錄的一球，羅馬里奧接應白必圖傳中凌空撞射破網，更是當屆其中一個金球。該屆兩名前鋒合共射入8球，佔巴西所入11球的7成，並協助球隊重奪失落24年的世界盃冠軍。