自CharlesDarrow發明大富翁，這家喻戶曉的遊戲至今已有七十七年歷史，推出過不同文字和設計的版本。取「命運」卡、買火車站、直接收監……八十前一輩尤其着迷，着迷到參加比賽奪冠、變成收藏家，甚至用真錢買地買樓。
記者：林佩婷
攝影：譚盈傑、王文忠、部份相片由受訪者提供
場地提供：Oliva（26119974）
夾擊玩家
在香港，玩大富翁的人很多，但儲大富翁的人不多，Clifford是其一。
Clifford有四十多款世界各地文字版及其他變種版本的大富翁，為何愛上這遊戲，得從大學生活說起，「有年復活節假期，放假唔知玩乜好，有人買咗盒大富翁返嚟玩，結果成個假期就係咁玩。」最初他只跟說明書規則玩，後來上網玩，發現玩大富翁也有策略部署，他總結出四大策略：「首先，永遠唔好買最平同最貴嘅地，貴地起乜都貴，而且數量少，數量少，自然少機會罰到其他玩家錢，平地數量多，則罰極都唔多錢；其次，純個人喜好，我鍾意買火車站、水務局，直覺其他玩家好易踩中，好彩呢個直覺都OK；第三，同人Trade地嗰陣，要諗清楚點同人傾，想換地的話，要諗點樣換完地唔會蝕底畀人；最後，可以同人夾份打低其他玩家，先睇大家手上揸到啲乜，再睇邊個玩家對你有着數或者對自己傷害性無咁大，同佢合作打低最大對手，再逐個擊破。」他批評某些人不懂玩大富翁，甚至玩法有錯，「亂咁買地，有人話要去到某個位先可以同人Trade地，其實每次到自己個Turn就可以同人Trade。」他贏多輸少，「試過同朋友夾擊第三者，對方覺得我哋明恰，玩到鬧交，嬲到成副大富翁掉埋落街。」
願望儲齊所有文字版
Clifford玩得投入，不用道具錢，改用真錢玩大富翁，貪其有真實感。「有次覺得玩堆公仔紙好無質感，用真錢玩，一張張紙幣摸上手感覺真實好多，咁啱我有個朋友儲開錢幣，就託佢搵啲滅亡國家嘅真錢、某啲國家因政府轉變而變成無用廢紙嘅紙幣，例如南斯拉夫、菲律賓同巴西。跟番大富翁由一元、五元至五百元咁代替，每個幣值有一百張，玩到殘仲過癮。」
九十年代開始，他邊玩邊儲，至今約有四十副大富翁，大部份更未曾開封，他愛儲不同國家的文字版，「每個國家都用本土街名，又用唔同語言，覺得幾得意，於是每逢旅行就買番款當地版本。儲到十零廿副後，又發現迪士尼、星球大戰等特別版，又有高爾夫球、足球等運動版，咁古靈精怪又得意，咪儲埋一份囉！連香港都有回歸版，仲有限量發售老夫子版。」他的最愛，是在美國買回來的復古木刻版，「感覺好特別！至於最大收藏願望，係希望儲齊所有文字版本，好似埃及、秘魯、阿根廷、沙地版等等，都幾有趣。」
簡史
珍藏
食「魚」最過癮
首屆大富翁世界大賽於1973年在紐約舉行，1996年冠軍就是本地作家畢華流，從和姐姐們夾錢買人生第一副價值十六大元的大富翁開始，他就沉迷至今。「話玩大富翁最緊要熟讀說明書，了解真正玩法。」他說：「以前啲人玩大富翁好似Shopping咁，幾日幾夜玩唔完，我熟讀說明書了解到真正玩法，成個遊戲最重要係『Monopoly』專利權呢個字，八個Monopoly（八種地段顏色）最精要，譯做『大富翁』其實有少少誤導，好難領略到專利權意思。儲齊一種顏色地段，有齊專利權起屋，可以罰人幾何級數嘅錢，咁玩先令人快啲破產。國際賽約玩三小時，初賽限個半鐘，足夠打敗對手。」
八十年代，他參加地區選拔賽，最初只為興趣，後因兩次奪亞激起鬥志，最終贏取出線資格，1996年到摩納哥蒙地卡羅參加世界大賽，出發前相約朋友研究策略。「同朋友花一晚研究，將要點寫晒入本藍色筆記簿拎埋去。計過數，要入五強就要喺四局累積過二萬分。『公益福利』卡約三分二係獎，三分一係罰；『機會』卡則獎、罰同直接指玩家去某一地方嘅機會率各佔三分一，擲骰仔最易擲到『七』，呢啲我全部計好晒。八個Monopoly又有唔同優劣，最多人搶就係橙色同紅色，因為係最旺嘅街，轉唔到彎就要坐監，又要重新行一次。」他說得頭頭是道，還以為一切順利，誰知他是最尾出發的玩家，形勢輸蝕，幾經辛苦才扭轉劣勢，「成副大富翁有28張地契，22地皮可以起屋。當時我只有四張地契，後來換吓又拍賣吓，我擁有深藍色最貴地段嘅專利權，嗰陣正好有幾條魚（術語，即玩家）喺彎位，結果美國代表踩中咗我地段，即時罰六百。我起到三間屋，罰錢幾何級數上，一踩中即罰千四，最正係其中一張『機會』卡指定玩家要踩中我太平山塊地，即係總會有人死。總共玩咗三個鐘，好緊張，玩到自己癡癡呆呆，搞鬼到又企起身擲骰大叫：『GiveMeSeven！』，或想坐監唔想罰錢就大叫『GiveMeJail！』」
玩遊戲看性格
比賽後，他將經歷寫成《蒙地卡羅戰記》，到2000年加拿大大富翁比賽，他落敗後自此再沒參加，不過卻有預科生阿軒看了他的書後參加比賽，還拿到季軍，「參加比賽最緊要開心，1996年嗰陣玩得好輕鬆，第二次玩，玩得好嚴肅，阿軒嗰年同我一齊去，入到Final拎咗季軍。」
現時，他會教學生玩大富翁，「正確態度係要從遊戲中搵樂趣，若成日諗住我要贏、我要賺錢又或打低對手，咁反而變得唔好玩。最過癮係見到條魚差唔多游到你塊地，你又咁啱起到間屋！」玩大富翁反映人性格，「好搞笑，教同學玩大富翁好睇到佢哋性格，女同學每次只起單幢屋，叫佢哋起多兩間屋都唔肯，話要留番啲錢穩陣啲，又唔係真錢，輸咗有也所謂呀？」他的兒子吳井然，自小已經跟他玩大富翁，「玩大富翁其實可以學到算術、邏輯思維同社交能力。例如同人傾換地，最緊要唔好激嬲人。玩得衰態度差，最後會自食其果，輸遊戲又輸埋風度。」
珍藏
