港股前日出現技術調整，前晚花旗股市造好，港股好友喺期指結算日梗係唔放軟手腳，一開市就踢高，恒指上過22439，不過晏晝賣地出現罕見場面，柴灣地皮冇人出價被收回，恒指急回過一段，但好快又企番定，最後報收22378，升268點。
地皮被收回唔會影響樓市氣氛，因為柴灣地皮缺點唔少，拍賣官嘅底價又貼市，而噚日拍賣嘅粉嶺地皮競投激烈，成交價理想，發展商係擇肥而噬。
中煤C輪24595：中煤能源（1898）噚日收12.66元，升2.7%。股價早排升破250日線之後轉為橫行，近日10日同20日線先後都升破呢條長期平均線，技術形態好靚，呢一轉應該會推上15元，可以諗吓隻C輪24595。
隻輪現價23.2仙，2011年6月10日到期，行使價12元，溢價13.1%，引伸波幅50.6%，槓桿率5.5倍（有效3.4倍），正股升上15元，24595睇39.8仙，正股跌穿11.76元就沽咗隻輪。
俊樺