林子祥（阿Lam）前晚喺理工大學賽馬會綜藝館舉行「LamMadeInLove」音樂會，阿Lam嘅媽咪、囝囝同乖女都嚟捧場，阿Lam個仔仲留咗「二撇雞」，十足十老竇翻版，而同阿Lam兩公婆相交多年嘅朱玲玲亦趁開場後低調撐場。
阿Lam喺台上唱足17首歌，令人聽出耳油，佢仲特別為觀眾炮製驚喜，就係找嚟太太葉蒨文（沙麗）做表演嘉賓，兩人先後合唱《零時十分》同《愛到分離仍是愛》，惹嚟全場哄動。
深情合唱冧晒
事實上近年阿Lam同沙麗屢傳婚變，今次佢哋同台演出大晒恩愛，用行動來闢謠，合唱時又情深對望，阿Lam仲錫老婆面一啖，阿Lam搞笑話：「係唔係好耐冇見佢，我都係，我好耐冇聽你唱歌，一聽就冧晒。」沙麗即甜笑話自己毛管戙。
今次阿Lam開騷將會收錄喺11月推出嘅DVD入面，到時佢仲會推出發燒碟同黑膠碟，一向正經嘅阿Lam仲大爆自己身世之謎，佢笑話：「我以為自己係madeinHongKong，點知就係madeinChina，呢個係秘密。」
明年紅館開騷
事後阿Lam接受訪問時話出年會喺紅館舉行演唱會，佢話同沙麗已經有幾年冇合唱，不過問到佢係唔係好耐冇見老婆時，佢強調自己係講笑，仲話冇刻意以厚酬利誘太太獻唱，佢話：「冇呀！我今晚都冇錢收。」