美國有肯德基家鄉雞（KFC）連鎖快餐，就在上市公司YumBrands（NYSE：YUM）旗下，系內還有大家熟悉嘅必勝客，在中國亦入股小肥羊（968）。中國式翻版有時真係唔到你唔服，一間只係由一個大學畢業自行創業嘅女人仔在四川重慶成立咗短短14年、原名叫「鄉村雞」嘅「鄉村基」、分店達101家、賣嘅快餐已經由雞餐發展至平民化川菜，連英文名都叫「CSC」，擺明就係抄啲唔抄啲，重係紐約證券交易所上市，代號「CCSC」。
PE再高都唔嫌貴
首日掛牌股價就由16.50美元嘅招股價，衝過上26.45美元嘅最高位，升幅竟達60.3%，收市價24.30美元，升幅仍達47.3%，公司09年營業額4.9億元人仔，盈利4510萬元人仔，同比增長69.4%，以30倍之超額認購反應，市盈率被搶高至65倍實屬預期之內。
成立於1972年、總資本超過40億美元、全球最大嘅創業投資公司紅杉資本（SequoiaCapital）肯定係大贏家，07年旗下紅杉資本中國以1000萬美元入股「鄉村基」上市前嘅15%股權，到今天賬面利潤翻近7番，隨時食鋪爆棚都唔出奇，反正全球資金氾濫兼同時睇好中國內需概念，幾多倍PE都話唔嫌貴。
紅杉資本曾染指蘋果、思科、甲骨文、雅虎、Google、Paypal，投資企業超過500家，當中40%已成功上市。在香港，近年湊大成功上市嘅例子就有匹克體育（1968）與人和商業（1387），望番佢嘅中國公司其中一位合夥人就係來自攜程網嘅原總裁兼首席財務官沈南鵬，對國情之了解唔使多講，佢哋投資嘅創始企業有兩種退出方法，一就係湊大後透過IPO回收資本；二是透過併購出售。你以為IPO搵得最多？創投先至係大茶飯。
香港同樣有隻甫掛牌就喪炒到近50倍市盈率嘅博士田雞，此雞與彼雞，狂起上嚟，理得佢係邊類雞！
胡孟青
作者為獨立股評人