長實（001）嘅馬鞍山新盤天宇海，係今年下半年最大型新盤，呢個盤有成1143個單位，賣成點，可以話備受市場矚目。由於政府出招打擊樓市，而且下月施政報告又出籠，長實實行以平盡同區二手價搶客，平均呎價只係六千零蚊，入場費低見380.9萬銀，真係唔買都埋嚟睇吓！
由於定價吸引，今日開賣嘅726伙極有機會一Q清袋，唔知係咪咁，長實大太子李澤鉅（圖），噚日中午就微服出巡，踩上天宇海個售樓處睇吓市場反應同順手參觀埋個示範單位。咁啱同場又有記者會進行中，於是，原本好低調到場嘅小超人就畀華華截擊！
點解市場反應咁好天宇海都唔加價賣呀？小超人真係唔問由自可，問起應該把幾火，佢話政府限制賣樓前3日要出價單「正正篤到自己最痛個度，明明反應好，但想加（價）都加唔到，啲客着數咗！」唉……答到咁，香港人有乜法子唔仇富呢又！
李華華