大部份人開枱打麻雀嗰陣，最緊要夠腳齊人，有件魚腩最好不過，站長就免嘞，至於144隻麻雀牌，只求打得順手，要求未必好高，對張麻雀枱，應該冇乜要求，總之坐低可以快快趣趣攻打四方城就得。之不過唔係人人都咁求其，打麻雀乃係國粹，係中華民族最博大精深文化，開枱絕不能是是但但，陳太同孖生妹妹方寧生，對麻雀枱原來好考究。
歐洲訂做人手貼圖
陳太有四萬之稱，同好多香港人一樣，閒來都會打吓衞生麻雀，年前為余若薇助選，更親自落場開枱，拍咗齣四萬撐公民黨短片。八方聽聞方寧生最近訂購咗一張全球獨一無二嘅麻雀枱返香港，日後約腳時，可能更有吸引力。
呢張獨家麻雀枱有乜咁特別呢？據講有次方寧生去歐洲，見到有張全人手做嘅枱優雅又有古典美，忽發奇想提出可唔可以訂做一張麻雀枱，由於歐洲傢俬製造商冇接過做麻雀枱柯打，方寧生要詳細解釋何謂一張標準麻雀枱，例如最少要有四個抽屜放籌碼。
呢張獨一無二特別訂製麻雀枱已運抵香港，表面睇係一張四方枱，其實手工十分矜貴，枱面風景圖畫係方寧生親自挑選，再以人手逐片逐片拼貼而成，放喺屋企似係一件藝術品，反轉枱面就係平滑嘅絨布枱面，變成一張麻雀枱。
麻雀枱係鎮店之寶
喺歐洲訂購呢張麻雀枱要幾多錢呢？方寧生話千金難買心頭好，價錢係其次咁話。麻雀枱家陣暫放方寧生下星期先至正式開張嘅大型傢俬店，係鎮店之寶，因為不少友好、麻雀腳去參觀時，都對呢張精品麻雀枱讚不絕口，紛紛查詢如何訂購。
方寧生做開旅行社生意，最近做埋傢俬店，專賣歐洲名牌家具，因利乘便訂製呢張麻雀枱，更攞到歐洲當紅嘅傢俬設計師ChristopherGuy獨家代理權，CG傢俬係潮物，電影《穿PRADA的惡魔》都用CG傢俬做佈景，下星期佢會嚟香港賀新傢俬店開幕。
mailto:[email protected]