阿婆都係黃金寶　踩入大麻城

「在哥本哈根唔踩單車，等於無咗對腳。」這是攝影師吟吟噆噆講咗幾次的「真心話」。這個全球聞名的環保單車之城，120萬人口卻有330公里單車路。單車除了可上巴士，繁忙時間政府還會透過交通燈號的控制，令三萬五千多個單車上班族，在單車路上處處綠燈直剷公司！

記者：陳慧敏
攝影：陳陶鈞

三成上班族踩單車

哥本哈根現有30%上班族踩單車返工，2015年，政府還目標要將單車通勤率增加至50%呢。北京同台灣，強敵來啦。
為了體驗道地哥本哈根人的生活，我們參加了個單車之旅。團友都是來自丹麥或是瑞典的師奶同阿伯，着住高踭鞋長風褸，唔似黃金寶：「全場最後生最sporty係我哋，呢程應該好輕鬆。」誰知一開波，不慣踩馬路的我們聽到車聲，紅燈一眨都會停，團友卻呼一聲飄了過對面岸：利落地落車就托車上樓梯；長命暗斜個個喊苦但都無人要落車推車！反觀我們，一出大馬路就大幅落後，托車又甩甩漏漏上山變咗越野車，團友個個睇落好輕鬆……連人都久經訓練，點鬥。

■最早為Absalon大主教建於1167年，曾一度是皇宮，現在是政府的辦公大樓。

■忽然與古典馬車同路，在咯咯聲的石磚路上一起衝。

■哥本哈根的舊股票交易中心Borsen。

■然後沿河道欣賞兩旁設計感的建築。

自由之城咪偷影

Mike做單車遊已16年，他還有特別tour如單車出境同單車夜遊。最基本的citytour會路經舊市政府、CastleIsland、ChristiansborgPalace、皇室圖書館及海旁等景點，但最難忘，卻是聞名已久的自由之城Christiania！Christiania，約40年前由舊軍營被露宿者佔領，吸引嬉皮士遷入，今日成為「邊緣人」的聚落。居民自定條例，有自己的電台貨幣國旗，暴力偷竊持械等統統被禁，然而大麻跟毒品卻是明食暗賣，據說犯罪者愛躲在城裏，警察要線人或疑犯也跑來抓人，「各取所需」。這樣有趣的地方，說不想拍照就假，但望見三步一個的「NoPhoto！」警告板，熬底。除了那條飄着大麻味的PusherStreet外，城裏壁畫塗鴉都歡迎拍照，還有人向我展示手中飄着煙的大麻。這裏的人如盛傳的有禮，還有專人溫柔地提示：「在這裏請勿拍照。」有個大隻鬍鬚佬睥實我，尷尬之時惟有扮純問影相，果然耍手擰頭，然他卻笑笑口：「好多謝你問我，令我覺得你尊重我，好多人亂咁偷影。」心裏即時抽一抽，好在無偷拍啫。

■用老倉房改建的教堂再變茶館。

■玩玩足球賽，像老少咸宜的社區中心。

■到處都是漂亮或霸氣的塗鴉。

BikeCopenhagenwithMike

收費：基本3小時市內遊，約$365起
網頁： http://www.bikecopenhagenwithmike.dk/

自由之城網頁： http://www.christiania.org/index.php

國寶級單車技師

SorenSogreni想當年：「80年代哥本哈根個個窮到褲穿窿！」無錢，人人踩單車，但一街爛單車政府都無錢處理，於是他們就去執單車重組。「三四架砌埋一部，噴過又行得走得！啲人嫌個單車鈴唔好聽或唔㩒都識響，我就幫佢整個靚銅鈴，全副幾百蚊賣畀朋友，越做越多人要！」開始接定單又做一些新設計的單車，到LouisianaMuseum都向他訂作「LouisianaBike」，變了藝術品，到02年獲丹麥設計師獎名銜變成luxury級設計，到國寶級銀器GeorgJensen都找他設計14部銀飾單車，每部盛惠4萬，Sogreni變了藝術家。但今日仍見他爛身爛世，一腳單車油，駕住架「蠻牛」單車吽吽聲嚇人。

■門口有架名車「蠻牛」：「試過踩住出去嚇人好開心，點知撞埋牆仲拮親自己！」

■GeorgJensen同款單車，不過人家銀做的，這部未完工未定價。

■店裏好多真皮古董單車帽，「我貪得意訂的！」

Sogreni

地址：SanktPederStraede30A,Copenhagen
網頁： http://www.sogreni.dk/

PaulSmith第二最愛

這間的單車設計玩年輕同花樣。線條利落又cutie，過2萬隻顏色任選。最巴閉是度身訂做的單車服務，根據你的腿長體重及日常所需，配合AA力學BB定理同CC計算（對不起，聽不懂），設計出最適合你的車轆軸距、鋼條長度跟角度。一台現成（無度身）單車約$3,000起，連PaulSmith都在此訂了一部純白色，現成了他「我的最愛」名單第二名！你都可以訂，一部盛惠萬六，謝謝。