添馬艦新立法會大樓工程如火如荼，立法會秘書處就新大樓外一條新路命名諮詢意見，提出兩個名畀議員揀，一個係立法會道，另一係議會道。
呢兩個名正常，不過冇乜特色，公民黨余若薇更認為秘書處建議的新路名稱太過平淡乏味，未能傳承立法機關歷史同彰顯本土特色，均非上乘之選，噚日去信秘書處，拋磚引玉，建議新道路可命名為「廷芳道」，紀念香港首名華人立法局非官守議員伍廷芳，有傳承立法機關歷史意思，亦可紀念本地政治人物。
余大狀話新道路命名，最理想係廣泛諮詢市民意見，由議員同市民一齊揀出最多人認同名字。家陣立法會同遮打花園之間一條路名為昃臣道，紀念19世紀滙豐大班昃臣，佢亦做過立法局前身定例局非官守議員。