10月10日喺西九直升機場會舉行亞洲首屆RedBull飛行日，44隊會自製飛行器，直衝6米高跑道奔向維港，飛得最遠、最有創意就贏，但八方噚日見過部份半製成品，幾肯定大部份最終連人帶機墜海。
「我哋隨時破大會207呎紀錄o架」。Alivenotdead嘅Vince參考過外國比賽片段，搵紮棚師父教佢哋紮個4米高竹枱，下面加轆變車，上面放架竹滑翔機，「佢哋喺下面推架車出去，我喺架飛機度一飛冲天」。
「我都覺得架機要夠輕，所以用膠水管，應該飛到3秒」。以為中大剛畢業嘅阿璁講嘢比較實際，點知佢跟住話：「到時上身着超人衫，下面就舞獅褲，因為隊名叫獅人飛機。」
代表Bosch嘅Andy攞住嚿發泡膠又話：「呢個係飛行器模型，到時闊3.5米，係用咗真正飛機嘅力學原理，上氣壓遇到下氣壓……。」
剛中大畢業嘅林宝就話，嗰日十全十美日好多人結婚，所以會着婚紗坐飛機，「因為我叫林宝，專登整咗o架林寶堅尼跑車，上面放咗架飛機」。佢哋嘅飛行器只係用木條砌，「好有信心可以飛到會展舉行婚禮」。佢講完自己忍唔住笑：「你哋嘅動新聞嘅旁白，會唔會笑我吹水唔抹嘴?」梗唔會，人有夢想，先可以飛。