美國民權領袖馬丁路德金喺47年前曾發表《我有一個夢》（IHaveaDream）嘅演說，而一眾現役NBA球星就喺周一嘅媒體日中，講出自己嘅夢想；其中公牛嘅控衞戴歷路斯向媒體大大聲咁講咗自己嘅Dream，就係要贏「最有價值球員」獎項，仲勁寸咁話：「點解我唔可以贏MVP？」
下周日將22歲生日嘅戴歷路斯，係今夏喺土耳其世錦賽嘅美國隊奪冠成員，之不過美國隊威到盡，但焦點往往只落喺「得分王」雷霆前鋒杜蘭特、老牌控衞比立斯身上，偏偏忽略咗擔演快攻箭頭嘅戴歷路斯。
每日keepfit谷到盡
戴歷路斯當然對此唔多高興，點知返到美國，亦成日俾人問有關熱火「3巨頭」嘅睇法，好似當正今夏積極增兵嘅公牛冇料到咁，唔怪之得戴歷路斯喺集訓首日，就怒火冲天咁講：「我每日都喺健身室鍛煉身體，亦盡力為球隊做得更好。對我嚟講，點解我唔可以贏常規賽MVP？點解我唔會被評定為聯盟內最佳球員？我睇唔到有咩原因係唔可以！」
戴歷路斯喺媒體日怒火中燒，相反喺佛羅里達州胡畢特美軍空軍基地訓練營集訓嘅熱火「3巨頭」就心平氣和得多，一向以總冠軍為目標嘅占士、獲迪，亦再重申今季任務要將此夢想成真：「目標只有總冠軍。」
柏加：馬刺最後機會
金塊前鋒安東尼、馬刺後衞柏加雖則同樣講咗對今季嘅展望，不過佢哋嘅前路就較為迷茫。近日陷入交易困局嘅安東尼，周一身穿金塊球衣出席記者會，強調自己從來冇講過要離開；之不過會喺賽季完結後同球隊傾談去向，並且保持開放態度。安東尼咁講，莫非今季會留喺金塊？
同樣喺下個賽季成自由身嘅馬刺控衞柏加，就講明自己想留隊，不過佢之前講錯嘢，話球隊今年係最後機會爭標，又指鄧肯就嚟35歲，班波再輸就冇咩機會o架啦！佢咁踩馬刺，球隊肯唔肯留佢就拭目以待。除咗呢班「超級巨星」講夢想，喺世錦賽技驚四座嘅中國前鋒易建聯亦講笑咁話，自己都有一個「夢想」要追尋，因為佢諗極都唔明白，點解父親會選擇31號球衣畀佢。