八方收到料，近日長實屋苑附近嘅便利店啲《蘋果日報》特別好賣，而且係大批大批咁被人掃走，唔通同我哋最近連番報道長實屋苑小業主紛紛起義、召開大會罷免長實旗下管理公司嘅消息有關？
2032張剪報傳單
有聽濤雅苑業主話，上星期五《蘋果》講佢哋屋苑嘅小業主、準備星期日開業主大會嘅報道出街後，傍晚每戶信箱都收到張剪報正本，剪咗呢段新聞出嚟，仲釘咗張紙仔喺上面，寫住：「負面的報導，對屋苑的形象及樓價是好是壞，不是顯而易見？為甚麼不先諮詢各業主而自行接觸傳媒？」
業主同時仲收到張單張，係長實管理公司高衞畀業主嘅「告別預告」，引述消息話除非過半數業主出席大會，否則高衞將唔能夠繼續「服務」，又話如果最終得唔到大部份業主支持，佢哋仍然感激業戶多年來信任云云。
有業主話，呢啲剪報同單張明顯想影響業主投票意向，特別係提到「樓價」，真係好絕，而佢哋嘅起義後來亦宣告暫時失敗。仲有，要整2,032張剪報出嚟，即係要買2,032份《蘋果》，成萬二蚊咁大手筆，有業主擔心呢筆數唔知最後會唔會變相又係佢哋出番。