浸大新校長陳新滋7月才上任，好快就有勁project出籠，佢噚日同八方講，搵到兩個國際猛人加盟，主管即將成立嘅創意研究所，一個係諾貝爾得獎人，會做研究所兼職主管，另一個做全職主管，來頭亦唔細，係香港出身嘅知名藝術家兼曾經喺哈佛任教嘅眼科教授。但由於兩人任命仍需校董會通過，暫時唔可以曝光住。
嗰位香港藝術家好特別，讀醫做眼科教授，本身冇讀過藝術，得過幾個名家指點，創意同藝術造詣已好勁，唔少外國傳媒都報道過佢嘅藝術道路。佢嚟浸大雖然攞教授級人工，但會將人工捐番晒畀浸大。
呢個創意研究所會集中浸大精英，創造新意念，亦會培養研究生。有位工業家已捐出幾千萬畀個創意研究所。陳新滋仲會讓咗校長府出嚟，改成所址。